Flugöryggissvið vill hvetja til þess að notaðar séu leiðar og tækniflugbækur (Aircraft Journey and Technical Log) í einkaflugi til þess að tryggja að bilanir séu skráðar og að upplýsingar um ástand loftfars berist á öruggan hátt milli flugmanna.

Þann 17. júní 2003 átti sér stað flugatvik á Reykjavíkurflugvelli þegar flugvélin TF-FKR sveigði út af flugbrautinni í lendingabruni. Fram kemur í skýrslu Rannsóknarnefndar flugslysa að stuttu fyrir atvikið munu flugmenn, sem flogið höfðu flugvélinni, bent umsjónarmanni hennar og flugvéltækni á nokkur atriði sem gáfu til kynna að óöruggt væri að starfrækja flugvélina.
Þar munu meðal annars hafa komið fram upplýsingar um að beita þyrfti hliðarstýri/nefhjólstýri óeðlilega mikið til vinstri í akstri til þess að halda flugvélinni í beinni stefnu, ennfremur mun hafa komið fram að flugvélin hafi leitað til hægri í lendingum. Þessar athugasemdir höfðu ekki verið skráðar í leiðar og tækniflugbók flugvélarinnar af flugmönnum hennar.

Flugöryggisvið hvetur því til þess að verklag við skráningu bilana í leiðar og tækniflugbók sé fylgt eftir af flugmönnum í einkaflugi. Ef flugmaðurinn sem flaug þennan dag hefði á aðgengilegan hátt getað kynnt sér ástand flugvélarinnar með upplýsingum úr leiðar og tækniflugbók flugvélarinnar kynni hann að hafa metið það svo að flugvélin væri ekki lofthæf fyrir umrætt flug.